被取消立法會議員資格嘅劉小麗，早幾日去完旅行返港後，大家都好關心，佢會唔會上訴？因為四議員DQ案嘅9月11日上訴期限將至，小麗嘅一念之差，將會左右九龍西補選係咪合併進行，亦即好大程度決定民主派會否變相送九西一席畀建制派。政制及內地事務局局長聶德權日前亦講明，補選安排9.11後會明朗化。

小麗最受關注，當然有原因，因為長毛話明上訴，即係新東兩席理應分開補選。羅冠聰原屬嘅港島區只有一席懸空，係咪上訴亦唔使考慮合併補選。姚松炎所屬嘅建測界功能組別，亦只由界別選民一人一票選返一席，建制派無法用陰招有機可乘。

八方今日都問過小麗最新意向，原來佢去完旅行後失咗聲，完全講唔到嘢，以短訊回覆時指今日已經見完律師，但未見民主派人士，相信未來幾日會見面。上唔上訴，錢肯定係關鍵，小麗坦言有關錢嘅問題，唔係一下子就有結果，暫時仍未決定係咪上訴。

守護公義基金發言人鄭宇碩就話嘞，現時基金畀咗「DQ」四人案第一期官司訟費後，剩返約280萬元；由於長毛已完成申請法援，因此會優先畀錢小麗上訴用。