英國萬人迷碧咸（David Beckham）同太太Victoria一直悉心照顧四名子女，得五歲嘅細女哈七（Harper Seven）已經學過騎馬同跳芭蕾舞，有報道指碧咸嫂已於義大利肯迪演藝學院為囡囡報讀課程，似乎有意捧寶貝女做明日之星。

據英國《太陽報》報道，位於倫敦嘅義大利肯迪演藝學院培育過英國女歌手Pixie Lott與Louise Redknapp，現時碧咸嫂讓哈七喺學院學習唱歌同跳舞，課程費用102英鎊（約1,024港元）一小時。據知情人士透露，哈七好鍾意上呢個課程，亦遺傳咗辣妹媽咪嘅唱歌跳舞細胞，好有潛質。