大台早前嗰節目《有樓萬事足》引嚟唔少迴響,當中爆出拜金港女Seasun連環爆出「有樓女人先有高潮」、「如果冇樓就唔好白撞」成為新聞人物，仲被網友起底係做過「趙女郎」，幫過城中風流富豪趙世曾打工，仲受惠過住過趙苑，不過有傳佢因為帶男仔返去過夜，搞到趙生嬲嬲豬趕佢走。

今日中原地產網就有趙苑單位出售，當中放緊一個4,600呎、實用有3,308呎樓盤，索價高達2.5億，即係平均實用呎價成7萬5千幾，《蘋果》就搵過趙生，問佢係唔係放盤，佢就話:「我哋係地產發展商，趙苑發展咗幾十年，有好多單位獨立屋同apartment，獨立屋都賣咗好多間，聽你哋資料成7萬蚊呎就應該係獨立屋，應該係二手轉賣，我哋依家多數都係apartment收租，都有做買賣，但印象中就冇獨立屋呢個呎價、呎數賣緊，你哋問返中原個貨源。」