名模何穎雯02年下嫁丁天立，成為立法會議員丁午壽媳婦後，躍升上流社會做名太。自稱何穎雯細叔的何錦棠日前向本報控訴，指摘何穎雯及她的父母攀附豪門後，嫌親友寒酸，對做小販的嫲嫲尤為不敬不孝，何錦棠指：「我媽媽做咗幾十年小販，養大我哋十兄弟姊妹，佢哋就覺得寒酸，直情唔畀我阿媽出席婚禮！」

何錦棠指當年父親息事寧人，近兩年父母相繼離世，他才忍不住要為受辱的母親討回公道，他說：「何穎雯兩個仔女滿月，都冇請爺爺嫲嫲，冇人知佢哋真面目，我諗親家都唔知，我就係要揭發呢家人係點對父母長輩。」記者聯絡了身在外地的何穎雯，她否認禁止嫲嫲出席婚禮，她說：「我諗冇啲咁嘅事，唔好意思。」其叔表示可以與她對質，她即支支吾吾說：「唔使喇，總之冇咁嘅事，唔使喇唔該。」隨即收線。採訪：DebbieLum