Supper Moment同鄧穎芝今早喺中環出席《PUMA 香港青少年道路接力賽 2018》，鄧穎芝有份參加接力賽，佢話：「小學之後未跑過接力賽，不過小學係每人跑100米，今次係每人跑2公里。」鄧穎芝仲話之前有夜跑，o依家就多數喺健身室跑機：「跑街辛苦啲，喺健身室跑有得嘆冷氣。」

考咗健身教練牌嘅佢，最近收咗第一個學生：「佢係得一隻腳嘅女仔，嚟緊會跑障礙賽。佢好好，好多難嘅訓練都做到，對我黎講都係好大挑戰，好似考緊牌咁。」鄧穎芝話暫時未有公開收生，因為要兼顧幕前工作。最近佢就拍緊網劇《PTU》，早前仲錄咗兩首歌：「錄咗兩個月，但未諗到點宣傳，希望暑假前可以出啦。」

Supper Moment就為大會擔任鳴槍嘉賓同表演，佢地話今朝6點半已經準備緊，下午就返深圳做音樂節，所以今日唔會參加比賽。成員Sunny話自己係成員中跑得最多嘅：「以前叫做校隊，不過都係為興趣多。我跑長跑，跑長跑可以做到好多預期唔到嘅野，初初你以為自己1公里都跑唔到，最後你可以跑到10公里。呢樣野影響我好多諗法，只係肯嘗試就做到好多嘢。」

精選娛聞，喺晒《娛果》
http://fb.com/appledailyent