明日（18日）沙田編跑十場，打吡大賽日，用全闊有得追的A跑道角逐，大部份是高班賽，戲碼甚強。上季同期，莫雷拉威風八面，共贏五場兼奪取打吡殊榮，今次騎足十場，有機會延續佳績；潘頓亦手握重兵，睇牌面就更勝一籌，有能力連場報捷，兩大高手足以控制大局。

第九場二班1200米，東廐「加州福星」不斷在轉變進步，初出一役夠快但頗急躁，熱身後次仗轉戰快活谷即贏，認真唔簡單，接住又輸了兩仗，後生馬演出水準未夠穩定，再出在田草同程落飛搏殺得手，上仗升二班跑泥地，在未盡發揮下亦闖入一席，論馬在二班一定企得住。

短途馬復課越見收斂，試跑懶洋洋，好懂得留力，然粗壯大馬走過好輕盈，今仗換上潘頓，排四檔靚位，做好留放應可再建一功。

「僥倖」今季贏四場，其實已超額完成，上回面對頂班谷草惡馬，無意攻堅操練也放緩，今次返二班即加強操練，快跳四課有三課柏寶親試，又擺出搏殺格。

「萬馬奔騰」最緊要健康穩定，受操狀態長期見好，今季陣上已交出兩Win，除谷草一哩落敗，其餘都爭入前列，演出好穩定。楊明綸騎熟例入前四名，跑法機動能跟能鬥，亦是今場爭勝分子。

「激賞」上仗初出跑泥地短途，毫無根據，但直路追得唔錯，所負不遠。復課維持正常操練，跑草地用莫雷拉，是一路奇兵。其餘「駿明珍寶」連拼不疲，「英勇大師」試閘仍肯追，都可兼顧。