時興倡議素食，原因之一係怕食得太多肉會影響健康，但若講到食排骨而導致冇咗個金牌，就真係聞所未聞啦！中國柔道選手佟文喺舊年嘅荷蘭世錦賽，被驗出對禁藥克倫特羅測試呈陽性反應，被國際柔道聯會褫奪世錦賽78公斤或以上女子金牌及禁停賽兩年。
現年27歲嘅佟文就堅稱自己無辜，更指係因為食得太多豬肉、肉排，令到自己體內殘餘過多嘅「瘦肉精」，我求大俠就唔係好相信啦！雖然話含禁藥克倫特羅嘅「瘦肉精」係動物用藥，可促進豬隻增生瘦肉，減少脂肪比例，之不過豬食咗之後，其物質主要留喺豬嘅內臟，好似豬肺、豬肝咁，究竟佟文長期食排骨定內臟先？

教練出面死撐

佟文從來冇講過自己平時食幾多，而且點解其他隊友冇驗呈陽性反應，只有佢先會出事；所以呢個反駁唔係好唔合邏輯，睇嚟「誤食論」說服力唔夠喎！
之但係佟文教練吳衛鳳就似乎為弟子「補鑊」，喺周一再次堅稱佟文係「百分百誤食問題食品」，但就唔肯再正面話係同食大量豬肉有關。睇嚟呢單「食豬食出禍」嘅案件，都要有排先至可以水落石出啦！