當年今日
關於我們

【好心忠告】張一鳴:我係罪人,過去2年阻住人發達!

蘋果日報 2018/03/11 21:07

張一鳴

資深地產分析員張一鳴表示:「大家都心雄,覺得樓價繼續升,政府做唔到野,全世界政府都會繼續支持,一面倒睇好,唔係淨係樓市,所有資產市場都係咁樣出現,全世界政府唔會俾資產價格跌,會托住,是全球的共識,不單是香港。」
一句講哂:「樓一定升!一定賺錢!上到市就變富戶。呢個係共識,共識係而家入市就發達!」對於有意見認為本港下半年受累美國而出現樓價調整,他回應:「呢樣嘢講咗幾年,但幾年來大家預測個樣唔實現,當你狼來了,講親都唔發生,仲要俾人鬧,一兩年前都係咁講,到而家樓價都仲未冧。」
他無奈道:「你俾啲忠告大家,但樓市仲升緊,你就錯哂,個市繼續上,賺少2年錢係咪你嘅責任先?大家心態覺得你俾忠告,你係錯,事實樓價仲升緊,你俾忠告你就係壞人。我已經無預測好耐,市場一面倒,短時間內唔會跌,泡沫永遠都係咁,而家擺度明就係一個泡沫,係一個好大嘅泡沫,佢唔爆咁解。無人能夠準備預測幾時會爆煲,一路都唔爆,全球各國政府都係度頂住,你見到大家入市唔係用基本因素、承擔能力去分析,好似炒bitcoin,個市係咁升,唔買蝕底,過去2年無買就蝕底,過去2年勸喻啲人就係罪人。」
被問有否被鬧是罪人,他回應:「係facebook鬧到我飛起啦!我哋呢啲咁嘅人係罪人,純粹睇過去2年,我哋真係阻住佢發達。而家俾忠告係俾人鬧到訓街。而家要俾嘅忠告,目前係一個超級大泡沫,幾時爆無人估到,幾個月、幾年、幾十年都唔定,全世界各國政府無計可出,頂住資產市場,你唔知政府可以頂幾耐,因為各國政府資源好勁,美國政府可出出QE4、負利率,全球各國政府都豁咗出去,你用邏輯同佢鬥,預測市場周期根本無得賭,政府出乜招都得,任佢玩。個個都睇到全球各國無所不用其極去頂住個市,咁2000後、2010後就要去買樓,因為買咗樓就發達。」
蘋果財經,關心你飯碗
http://fb.com/appledailyatm