當年今日
關於我們

堅哥與你:二○○二年 - 葉一堅

蘋果日報 2002/01/01 00:00


二○○一年過去了,二○○二年今日開始。恭喜你,咁艱難的二○○一年都冇難倒你,今日重可以花六蚊歎吓《蘋果》,算係咁啦!
每一個新年開始,我哋都應該歡喜若狂,充滿信心地去面對,尤其今年,因為去年風浪實在不小,但疾病沒有絆倒我哋、經濟沒有拖垮我哋、燒炭風沒有吹逝我哋、民航機沒有撞死我哋、轟炸機沒有炸散我哋……算係咁啦!
在新的一年,相信香港環境不會好到哪裏去,但又一定不會差過去年。既然去年我哋都可以捱過,今年又有乜嘢理由唔掂?
不過,記得今年不要寄望別人來拯救,尤其是政府,就算政府不是無能,但一定不是萬能,求佢不如求自己。

後記
《蘋果》都有新年願望。公信力高啲、讀者多啲、錢賺多啲、官司少啲、工傷意外少啲、錯誤少啲、炒人少啲、陽光故事多啲、悲劇少啲、獨家猛料多啲、例牌行貨少啲……。


堅哥電郵:[email protected]


逢周二、四、六刊出