港史上首位!12歲音樂神童入選維也納兒童合唱團
圓方李八方ONLINE維也納兒童合唱團Harry Nicholls
維也納兒童合唱團(VBC)係世界首屈一指嘅合唱團,澳洲裔嘅Harry Nicholls兩年前獲邀加入VBC,成為香港史上首名入選嘅男童,今年夏季畢業返港。現年12歲嘅佢已「身經百戰」,曾隨合唱團走訪多個國家表演,包括加拿大同韓國等,更試過喺日本皇太子同王妃面前獻唱後,被大讚唱得好。
「台上一分鐘,台下十年功」,Harry喺維也納嘅訓練一啲都唔輕鬆。佢喺2013年時獲邀試音,之後飛到當地嘅寄宿學校體驗兩星期,翌年再正式入團,展開為期兩年嘅合唱團訓練。佢話每日團練同個人訓練共兩個半鐘,老師都好嚴格,仲要用德文上其他堂,例如物理同數學等,壓力大到頭痛。周末有時仲要朝早6點起身去為彌撒唱歌或者練習,全靠對唱歌嘅熱愛撐住。
而佢對音樂嘅熱愛係受到媽媽Leanne Nicholls薰陶。Leanne係香港城市室樂團嘅創辦人兼藝術總監,Harry 6歲時已開始跟媽媽學唱歌。Leanne話仔仔喺受訓後變得更獨立同有自信。Harry返咗香港後,仍會每日唱歌,亦學緊結他同打鼓,想第日做專業歌手。佢12月3同16號會聯同香港城市室樂團於圓方,舉行迷你聖誕音樂會,觀眾可免費入場。
日期時間:12月3日下午6時至7時半、及16日下午4時至5時半(共兩節)
地點:圓方商場金區1樓
部分表演曲目:「Walking in the air」、「Dance of Snowman」等
資料來源:圓方商場
12歲男童Harry Nicholls係首位香港獲邀加入維也納兒童合唱團嘅男童。(王心義攝)
Harry(右)受媽媽薰陶,自小熱愛音樂。(王心義攝)
Harry喺維也納受訓壓力大到頭痛,仲好掛住住家飯同點心。(王心義攝)
Leanne話,好多維也納嘅同學仔都唔識彈琴,反而香港家長就好緊張仔女嘅音樂發展。(王心義攝)
Harry話每日會聽住歌刷牙,沖涼就超大聲唱歌。(王心義攝)