當年今日
關於我們

隔牆有耳:馬丁絕提 - 李八方

蘋果日報 2008/06/12 00:00


「風再起時,默默地這心不再計較與奔馳……」香港「民主之父」馬丁唔再連任,雖然未正式喺立法會封咪,不過噚日相信係佢議會生涯最後一次提出動議辯論,佢嘅「絕提」係力促中央唔好干預特區內政,尤其係唔好操縱選舉。
阿爺在明在暗出手介入香港事務,相信好多人已經見怪不怪,馬丁噚日嚴厲批評特區政府,指政府多年嚟唔單止對呢啲情況視而不見,反而全力協助,將高度自治交回北京,令人覺得近呢幾年香港民主逐漸倒退。
馬丁出呢招未必係空前,但肯定係絕後嘅動議辯論,泛民主派議員梗係連環發言力撐,前綫卿姐同馬丁交情深厚,對於馬丁臨別一擊別有感受,只可惜係呢個動議被否決,言詞間好似十分遺憾咁。禁止北京干預香港事件,唔使阿爺「干預」,左派自動波識做嘢,民建聯主席譚耀宗修訂動議,話要感謝中央多年嚟「關照」香港喎。自由黨楊孝華、林健鋒都有發言,爭取機會擦阿爺對鞋。
馬丁85年晉身立法局,廿幾年嚟身經百戰,唔少官員都讚佢辯才了得又有幽默感,佢告別議會,最唔捨得佢嘅,竟然係民建聯曾鈺成,雖然佢噚日鬧馬丁「只許美國放火,不許中央點燈」,但日後少咗個勢均力敵對手,八方相信阿曾都冇乜心機開會。
動議辯論通過與否都對政府無約束力,已淪為議員噴口水大會,好多人懶得現身,馬丁睇唔過眼,不時要求數法定人數,噚日佢又㩒鐘要求點人數,下屆少咗呢個立法會「班長」,議員可能輕鬆一啲。
八方睇番立法局會議紀錄,馬丁廿幾年嚟不斷爭取民主,今時今日重讀86年份講稿,相信都冇發覺有問題,唔係馬丁不思進取,只係香港民主只得寸進,諗真啲都幾悲哀。林D9代表政府答辯時口不擇言,指唔希望議員再提出對中央政府有猜疑嘅辯論,又話呢種反中態度,上世紀八十、九十年代先有市場,𠵱家已經過氣。爭取民主唔係買賣,議員監察政府係職責所在,林D9果然狗口長不出象牙,馬丁話對官員公然自我閹割,感到好驚訝。

mailto:[email protected]