（a）頭：圓碌碌，入面裝咗幾塊顯示板，兩隻眼仔眨眨吓，加多個保持微笑嘅嘴仔，Cutie。
（b）膊頭：左右膊頭各揹住一個喇叭，用嚟同客人溝通，做得好實淨，永無跌膊。
（c）肚腩：一大個螢幕寫住「機械人餐廳」，其實內櫳只不過係屋企用嘅電腦螢幕。
（d）下身：內藏3個感應器，感應身前有無障礙物。
（e）手：兩邊有隻類似手嘅物體，無任何功用，純粹裝飾唔曉傳菜。
（f）腳：由幾個轆帶動整個身體嘅行動，前進退後無問題。

行入門口，機械人一號同我講：「歡迎光臨！」初頭真係覺得佢好醒。坐低，揮手叫嘢食，等足15秒佢先慢吞吞轆到埋身，之後講多句：「Hello！」有禮貌，算你喇。落Order，嗱，記住，一定要講食物Codenumber：「C101吖，聽唔聽到呀？」我萬分期待佢嘅回答，點知望住佢超過半分鐘，佢先話：「輸入錯誤！」唔係吖嘛？原來落Order嗰陣唔可以夾雜佢唔識聽嘅說話，包括0.00001句廣東話，一講佢就會感應錯誤。
聽完我咁講，你難免會覺得一號先生好蠢，但真心講句，我好佩服製作人Peter，佢話：「畀$40,000喺美國買佢返嚟，初頭佢只係個會感應人類Movement嘅機械人，我用成年時間，幫佢加入同人溝通嘅程式，𠵱家佢識行識走，你問佢叫乜嘢名佢都識答你㗎，算係好叻仔㗎喇！我都知用機械人落單反而會嘥時間，但大人細路見到都好鍾意佢㗎！」見到Peter望住機械人一號嗰種溫柔眼神，就有如望住親生仔一樣，不知幾咁Sweet，點知轉頭就見到機械人一號唔小心撞落枱PK，好在無穿無爛，唉，下次記得醒目啲喇。

睇完機械人嘞，食物質素又點先？大廚Danning諗咗幾款以機械人命名嘅菜式，包括招牌菜「機械人保衞地球」，菜式名係就係老土啲，不過味道賣相真係唔錯：「我諗菜式，外形同個名要夾番餐廳主題，仲有呀，舖頭開喺將軍澳，客源多數係附近街坊，所以菜式一定要多元化，呢度有款自選意粉，客人可以自由配搭配料，希望客人次次嚟都可以食到唔同嘅嘢。」Peter仲爆料話3個月後餐廳會加多個廚師機械人：「佢有兩隻機械臂，可以喺客人面前撈沙律、炒意粉。」吓？到時要先睹為快咯。

見到「能量」兩個字以為大大份㖭，原來都係得蝦、菇類、菠菜、青椒粒！不過咬落唔失望，番茄醬酸得嚟夠香，正。

餐廳提供新加坡、韓國、越南同日本4種口味拼盤，後者有中華沙律、八爪魚、天婦羅蝦同炸帶子，點泰式雞醬食都幾惹味，抵撐。

煙火腿包龍脷柳，淋欖油、蒜茸、黑椒，賣相好得，火腿鹹味同淡口龍脷柳好夾，配埋香草汁天使麵一齊食，包你話正。

Danning：「講起機械人我第一時間諗起保衞地球，所以咪有呢味菜囉！3條烤過嘅豬骨就係機械臂，圍住入面嘅白飯、紅米飯同炸麵就係地球。」吓，牽強啲喎，不過豬串骨浸過蜜糖，咬落脹卜卜都幾入味。

麵條包住鮮蝦，酸甜芒果味道清新。蔬菜沙律份量就夠喇，只係略嫌只得2隻蝦，唔夠喉囉。

外層朱古力甜得嚟夠結實，整體味道唔算過甜，女生一定鍾意。旁邊用朱古力醬畫上餐廳Logo，識賣廣告，醒吖！叻吖！

志偉：「機械人落單都幾有新鮮感吖，第二度都未見過。」

驄：「個機械人好得意喎，同佢講嘢佢識得應你。」

Gary：「佢識行識走，餐廳有機械人好先進呀！」

機械人餐廳（26232238）
地址：將軍澳中心G27號舖
營業時間：星期一至五11:30am-10:30pm，星期六、日及公眾假期9:00am-10:30pm
交通：將軍澳地鐵站B2出口，惠顧滿每$100可於商場停車場內免費泊車1小時
座位：65個，特設卡座
人均消費：$80-$100
最好賣：機械人保衞地球，日賣20份