劉嘉玲今晚喺銅鑼灣出席皮革袋飾品牌MeChar嘅開幕活動，支持創辦人、前澳門兩任特首何厚鏵囡囡何芓諄，而何超瓊、何超盈、何猷亨、梁安琪、莊家豐等人都有到場支持。

早前劉嘉玲將自己坐巴士嘅相放上網，佢話：「坐巴士好正，同埋赤柱係call唔到的士，司機又放假，所以就坐巴士。」嘉玲又自嘲似大鄉里，冇八達通，但覺得坐巴士好興奮、好舒服，可以睇風景。問到有冇留言陳志雲涉貪案，嘉玲就話冇睇新聞，唔知發生咩事，但相信法律。

另外，超盈就同埋細佬何猷亨一齊到場，但係猷亨留咗一陣就極速閃走，超盈就否認細佬怕被追問緋聞。至於，佢早前出席荷李活影星里安納度狄卡比奧（LeonardoDiCaprio）喺法國南部嘅慈善ball，花15萬金拍賣到由BenAffleck做監製電影《LivebyNight》探班機會，仲可以同佢哋一齊食晚飯，超盈就表示嗰餐飯仲未食。