香港郵政局超錯，但錯有錯着，有機會打破香港郵票拍賣嘅世界紀錄。事關香港1865年初曾經唔小心發行錯體維多利亞女皇像郵票，將原本棕灰色印錯做橄欖棕色；原本皇冠下面印住「CC」字樣嘅水印，又印錯喺皇冠上面，當時因為唔夠時間改印，明知出錯都照舊賣畀市民。

全球得番40幾張

就係咁，當時面值「九十六先時」（96cents）嘅郵票，146年後價值勁升，一連四張郵票家估價高達800萬至1,200萬港元。
郵品專家NeillGranger話，呢套錯體郵票分分鐘係亞洲郵票拍賣入面最貴。佢話當時郵政局推出超過12,000張郵票，家全球得番40幾張，一連四張就得呢套，勁受收藏家歡迎。Neill話單一張錯體維多利亞女皇像香港郵票，估值成80萬至100萬，一連四張就更矜貴。呢套郵票聽日下晝喺置地文華東方酒店拍賣，個拍賣會今、明兩日仲會拍賣超過2,000件、估價近3千萬元嘅郵品、錢幣、債券同股票。

錯體維多利亞女皇像郵票

錯１：原本棕灰色印錯橄欖棕色
錯２：原本皇冠下面印「CC」字樣水印，印錯喺皇冠上面