相隔兩年多再到電台做宣傳,陳慧琳(Kelly)昨日與監製Alex Fung到商台宣傳新歌《So Hot》,為新歌排舞,令Kelly更弗之餘,又激發她工作的火。
曾獲無綫《勁歌》「最受歡迎女歌星」和「亞太區最受歡迎女歌星」的Kelly,被問到前晚有否收看勁歌頒獎禮,她竟說:「冇睇,唔為意噚日舉行,冇開電視,忘記咗,今日睇報紙先知。」
對於歌手似乎都怕了奪得「亞太區最受歡迎」獎項,Kelly率直說:「下次cut咗佢,費事尷尬。」對於王菀之憑《留白》奪「金曲金獎」賽果令人錯愕,Kelly大讚首歌好聽,身旁的Alex Fung透露編曲是出自其手筆。
談及G.E.M.近日批評頒獎禮機制言論,Kelly覺得毋須太緊張頒獎禮:「佢把聲咁powerful,仲有排唱,只係佢率直,年輕人係要撞吓板先知。」
採訪、攝影:馬建華