黃秋生、林德信同鄭丹瑞大女鄭瑤今日喺柴灣出席「漂書節2016」揭幕禮，席上仲有方國珊，秋生同方國珊密密斟之餘，亦應要求合照。

向來鍾意睇書嘅既秋生，佢透露屋企有間書房，笑指書本儲量足夠壓死佢。問到兩個仔仔有冇受佢影響鍾意睇書？秋生話：「有卦，佢哋喺第二度，大仔o依家有睇佛經，因為佢修緊佛學。」咁咪可以喺秋生書房搵書睇？秋生即刻話：「簡單、入門嗰啲我唔睇。」

對於契仔陳冠希女友秦舒培原本有份參與內地節目《我的新衣》，但最後疑似因為林志玲而落空，陳冠希代女友出頭，喺微博鬧爆林志玲，秋生話：「呢啲嘢，我唔會多事，幾廿歲人，等後生自己解決。」陳冠希被指蝦女人，秋生表示：「話乜都好啦，又唔知後面發生乜事，表面睇件事就表面處理，否則越搞越亂，不如諗下9月投邊個仲好啦，切身問題丫嘛。」問秋生會投邊個？佢就話：「梗係投啲人啦，唔通投啲微生物呀，好似有啲單細胞微生物都出嚟，嗰啲自己分裂。」問佢有冇人選？秋生表示：「梗係方國珊啦，似番個人，照顧民生，勇於發言，有正義感，無黨無派，咁多年見到佢做嘅嘢似樣。」提到王維基亦有參選，秋生話：「個人喜好啦，有人食辣，有人食甜，但唔會有人鍾意食『茄』丫嘛，我講緊嗰啲微生物係『茄』，正常都唔會食，各有所需啦，但千祈唔好食『茄』，我呢啲話粗理不粗。」

對於台灣《蘋果》日前有指林德信與女伴參加陳妍希婚禮，其間女方「摵」林德信屁股，又幫林德信按摩手臂，林德信笑住話：「好多女仔摵我屁股，我哋成班朋友一齊去。」問到對方係咪女友？佢話：「我淨係睇香港新聞，所以我唔知邊個，答唔到你，但係冇呀。」o依家單身？佢透露現時同莎士比亞拍緊拖，因為最近忙於排緊舞台劇，會唔會叫緋聞女友AGA睇？佢話：「會叫佢買飛睇，唔送飛，因為要搵錢。」提到林德信擔任AGA音樂會表演嘉賓，首場拖手合照，但第二場變成撬手，佢解釋：「第一晚狀態好好，但第二場，我排舞台劇排到好攰，我都唔知自己做緊咩。」