【娶得過】失業「Lord賓」仲想買290萬勞斯萊斯 女友直斥：你係咪無腦架？
蘋果日報 2020/06/19 22:10
丹麥哥本哈根勞斯萊斯賓特拿足球菲琳
曾經效力阿仙奴多年，有「Lord賓」之稱嘅丹麥前鋒賓特拿，自從12月同丹超球會哥本哈根完咗約之後就一直賦閒。而近期佢就跨界同女友菲琳一齊拍電視真人show，而真人show內容就爆原來失緊業嘅「Lord賓」之前想買架成30萬鎊（約290萬港元）嘅勞斯萊斯，菲琳仲因為咁非常火滾，仲大鬧男友究竟係咪無腦。
早在一月尾，賓特拿已經透露自己同女友菲琳一齊拍真人show，節目名就叫《Bendtner and Philine》，而近日喺節目入面菲琳就大爆待業當中嘅賓特拿，睇中咗勞斯萊斯嘅價值30萬鎊嘅新車「Black Badge」。菲琳就喺節目入面憶述過程，「佢（賓特拿）當時已經飛咗去德國準備入手架車，但其實佢已經失緊業，佢只想要嗰種全丹麥嘅人都冇，但我有嘅虛榮感。我無嘢再好講，佢根本無腦同埋唔清楚現實係點，佢只係知道自己想要，然後就去買。」
而賓特拿亦都有講出自己嘅諗法：「菲琳覺得使咁多錢買架車好癲，我可以理解嘅。但我會唔開心係因為呢架車我夢寐以求好耐，而我用我嘅錢得到佢，唔覺得有咩問題。」最後，因為武漢肺炎疫情，「Lord賓」賣唔出啲舊車套現，所以打消咗買新車嘅念頭。識得為另一半慳錢，呢啲女人娶得過喇！
賓特拿同女友菲琳因為買新車而曾經嘈交，女友更指男方無腦。
賓特拿心儀嘅就係呢架勞斯萊斯「Black Badge」。
兩人已經相戀多年，非常恩愛。
菲琳都係一位身材火辣嘅索女。