早前bma唱片加入由四大唱片成立嘅HKRIA，形成五大局面，咁HKRIA因歌曲版稅問題同無綫對抗，所以bma又變埋無綫嘅敵人，結果bma旗下嘅周麗淇幾乎成炮灰被飛出無綫新劇《我的如意狼君》，好彩最後遭bma解約放生，佢先大有機會翻生再參演，但同屬bma嘅梁奕倫就冇咁好彩。
一直以嚟梁奕倫都有份主持無綫嘅《今日VIP》，但因為佢係五大bma旗下藝人，所以日前佢突然被叫停工。馮仁昭聽聞bma方面都願意同梁奕倫解約，等大家方便做嘢，而無綫總經理陳志雲更曾經向bma方面話，因為梁奕倫唔係歌星，問題唔大，應該可以好快復工。

「停咗兩星期」

不過到噚日，梁奕倫依然未收到復工消息，據聞內部人員曾向佢嘅經理人透露，未有收到任何指示，梁奕倫噚日喺電話度話：「平時係逢星期五收下星期通告，但今日都未收到，計埋就停咗兩個星期。有唔開心同無奈，因為覺得自己好被動，估唔到我哋呢啲唔係歌星都關事囉。」咁啱梁奕倫同無綫份約三月就滿，佢話希望事件可以盡快圓滿解決。