黃鴨風潮欲斷難斷，仲殺入今年工展會同工展小姐爭妍鬥麗㖭。呢一隻黃鴨當然唔係大陸嘅A貨，而係貨真價實、由香港鴨爸林亮，喺65年前親手設計嘅元祖鴨仔，復刻咗喺工展會會場義賣。唔講唔知，呢隻陪住細路仔洗白白嘅小黃鴨，原來背負住反抗日本經濟侵略嘅歷史意義。

過埋今屆工展會就90歲嘅林伯老當益壯，佢話呢隻鴨仔嘅模具保存咗65年，靠佢係喺1948年做咗全中國第一隻黃色鴨仔，係用嚟反抗日本經濟侵略，「嗰陣香港人玩嘅玩具，全部係日本貨，我見到日本經濟侵略香港好氣憤，思前想後，就做咗一隻連沖涼都玩得嘅小黃鴨」。
林伯自豪地話，憑呢隻小黃鴨，開創咗香港嘅玩具王國，殺出歐美，「荷蘭嗰隻黃鴨喺藝術品，我哋嗰隻係一隻真正玩具」。林伯話，今次按元祖小黃鴨設計咗多款黃鴨喺工展會義賣，係希望時下青年，可以明白當年嗰一代人嘅拚搏精神同勤𡚒鬥心，「全場限量3,000隻，賣晒就冇」。

施榮懷：佳麗靚過舊年

今次工展會除咗有新登場嘅小黃鴨外，當然唔會少咗一年一度工展小姐選舉，今年共有九位佳麗參選。
主辦單位廠商會會長施榮懷仲口花花話，行過廁所見到今年工展小姐候選佳麗靚過舊年。候選佳麗之一、南北行巿場助理李文潔噚日就先拔頭籌，贏得最合眼緣獎。

mailto:[email protected]

足本收睇《亂噏24》謝安琪；肥螳螂王晶接力上場！
周一至周五約定你《亂噏24》： http://bit.ly/appletalk24