黃心美同黃心穎呢對圈中姊妹向來感情好，二人現時同居，感情生活亦都有着落，心穎BB同馬國明發展得唔錯，黃心美同29歲師弟陳安立(Brian)、即係保釣烈士陳毓祥嘅兒子，疑秘密拍拖(新聞連結： http://bit.ly/2sV42At )!

不過佢哋應該想享受天倫樂多啲，因為佢哋唔係成日見到媽咪，黃媽長居多倫多，閒時會參加啲跳舞表演，身型keep到好fit!

大家姐黃心美今日喺Instagram貼出同媽咪合照，留言：「媽，啱啱同你facetime好開心呀。過去幾年因為好多理由成日叫你回流返香港⋯鍾意Daddy有你陪，鍾意你照顧得bacon同miffin好好，鍾意你煲嘅湯，鍾意你嘅笑聲，鍾意你喺身邊。」

不過黃心美都理解黃媽，佢續道：「不過我唔係你，我冇辦法感受到你喺溫哥華嘅快樂同喺香港嘅唔快樂。o依家我會諗，或者俾你做你自己鍾意嘅事亦係孝順嘅一種。只要你健康快樂就好！真係好抱歉今次你返嚟香港，我因為做嘢，所以好少時間陪你。祝一路順風，唔好等到聖誕節先再返嚟呀！love you！」

有網民大讚心美同媽咪笑容勁似，亦有網民問「點解全家人喺hk…你媽咪都寧願自己喺外國嘅」、「爸爸媽媽分開住」等問題。