話明係「親密戰友」，民建聯15歲生日，煲呔梗係要送份大禮畀佢，噚日佢就將成個下亞厘畢道政府總部搬咗去中環大會堂美心大會堂，帶住三司長十二局長去晒冷贈興。送完厚禮仲嫌唔夠，煲呔即席都要大送高帽，大讚民建聯地區實力雄厚，絕對係「民意嘅雷達」，仲話要同佢哋結伴走入群眾，真係唔怕有肉麻至死嘅奇聞發生。
乜三司十二局好得閒咩，可以成棚人落晒同民建聯吹蠟燭唱生日歌？當然唔係啦，但係老細一聲令下，邊個敢唔聽話？選票永遠至上，冇人唔明解啩。

好似政制及內地事務局咁，局長林D9負責寫政改報告書，報告今日出街，點會咁得閒走落嚟兩頭騰？勞工及福利局局長張建宗夠係啦，日前老竇掟女落街單倫常慘劇已經夠大鑊，噚日仲整單天秤倒塌導致兩名工人死亡嘅意外，雖然心繫勞工嘅小樓王已經視察完出事現場先showup，但既然佢下令全面檢查全港天秤地盤，有時間都應該去督促吓班𡃁啦。仲有商務及經濟發展局長馬時亨，港台搵邊個做接班人聽聞令政府頭痕，點解唔專心揀吓蟀呢？
有啲局長就真係唔請都要去。頭號人選首推民政事務局長曾德成。佢大佬曾鈺成係民建聯創黨主席，連帶佢同民建聯都有親。據聞噚日身在北京出差嘅曾德成，放棄國家體委請佢嘅午宴，特別搭早一班飛機返香港，目的都係為民建聯贈興，結果畀佢趕到，仲成為「壓軸」上台嘉賓，氣勢同掌聲都勁過煲呔多多聲。不過，記者叫兩兄弟企埋一齊影張相，叫極兩個都唔肯制。

新丁財經事務及庫務局長陳家強都要到啦，盲衝衝摸入政界已經好危險，唔事先巴結吓呢班政壇老手，真係唔畀人玩死至奇。唔使兩吓手勢就破咗新世界刑毀案，保安局長李少光咁巴閉，都係時候落去飲返杯。
民建聯副主席葉國謙對煲呔大晒冷就講咗句「多謝畀面」，話最實際嘅親密夥伴關係都係喺政策上多啲溝通同聯繫，唔通佢嫌煲呔呢啲門面厚禮唔夠實際。
噚日有個人都應到而冇到，就係民建聯主席馬力。阿謙話馬力近期出席喺人多地方之後，病情都會轉差，健康麻麻，所以都係遵從醫生吩咐，唔會喺人多地方亮相，暫時都係復出無期。