好多人食過飛機餐，有冇發現肉類多數都係牛肉？八方同港龍航空餐飲部助理經理Dennie傾開，佢解釋因為機艙比較乾，所以要用肉汁多嘅肉，如牛肉、羊肉。八方試食佢哋最新同JW萬豪酒店中菜廳總廚葉國輝合作嘅飛機餐，其中松茸錦繡炒牛柳粒，一咬落去好juicy，原來係用日本和牛做。如果喺飛機度食，咪係最high嘅和牛？

唔好以為坐經濟客位實食唔到呢啲好嘢，港龍家喺北京、上海航班嘅所有客艙，都提供呢款新菜式。其他菜式包括大千雞球、柚子醋青瓜海鮮、黑米醋燴牛仔骨等。坐台北、高雄等航班就只有商務、頭等位先有。
大家都聽過，人嘅味蕾靈敏度喺高空會減弱，所以飛機餐味道會加重。有常出差嘅人就因為咁唔敢食咁多，擔心太多鹽同豉油。但Dennie話唔會因為咁落多啲鹽，因機艙好乾，落太多調味料會口乾，佢哋只係用多啲食材去煮，令到啲味濃啲。仲有，原來空姐冇份食客人嘅飛機餐㗎，公司會另外預備飛機餐畀佢哋，但就唔會落太多洋葱、大蒜，「因為唔想佢哋有口氣嘛」。