佘詩曼今日喺澳門出席活動，阿佘話自己都鍾意收藏手錶，佢話：「手錶就好似飾物，係大部份女人都想擁有嘅收藏品，我都有收藏，但係唔多，因為好貴。我最鍾意嘅係古董錶，最寶貴嘅一隻係爸爸留畀我嘅，係男裝錶，嗰陣時我就開始鍾意手錶，同埋知道時間嘅重要，o依家隻錶放咗喺屋企，有時都會攞出嚟睇下同埋戴吓。」 問到阿佘會唔會一代傳一代，將古董錶留畀自己個仔？佢就話：「我留返畀我細佬。」

阿佘聽日會去廣州工作，之後接拍一套內地劇，明年1月開鏡，佢話：「聖誕都有一日假，會留喺香港同朋友一齊慶祝，我哋今年會交換禮物，但係我未得閒去買，佢哋又話唔準買禮券，好嚴格。今次我哋仲有一個wish list，個個會寫低想收到啲乜嘢禮物，唔可以講畀對方知，但係過咗兩、三個星期，我都未諗到想要啲乜。」問佢有冇想要嘅禮物，佢話：「有，不過想諗吓先，我三心兩意，我鍾意啲貼身啲嘅嘢。」問到佢係咪想收性感內衣？收到會唔會好驚？佢就笑話：「唔會，我相信我朋友嘅品味。」

再提到之前接受訪問時大爆自己嘅擇偶條件，問到阿佘冇男朋友喺身邊，今個聖誕會唔會好寂寞？佢就話：「唔會，我咁多朋友，我今年得一日假，分身不下。」阿佘話好享受工作，但都期待愛情來嘅時候，問到佢對男友有冇一個wish list？佢笑話：「冇乜特別，要欣賞對方，有共同話題，我鍾意啲man啲嘅，所以煮嘢食呢啲都係留返畀我。」

精選娛聞，喺晒《娛果》
http://fb.com/appledailyent