陳豪和陳茵媺（Aimee）自從生B後鮮有兩公婆公開露面，今日兩人恩愛到圓方出席Tiffany腕錶概念店活動，已經係三兒女之母嘅陳茵媺完全回復狀態，以靚媽姿態現身，老公陳豪陪伴在側，散發甜蜜幸福。

兩公婆透露今日有屋企人幫手睇小朋友可以出嚟見大家，陳豪話：「好耐冇一齊出嚟，太太收埋咗好耐，o依家回復狀態係時候亮相，正式工作。」Aimee話：「一直都好鍾意拍戲，o依家恢復狀態拍電影係好事，嚟緊會多啲出嚟正式返工，開頭都以為自己會唔習慣，可能個心好鍾意工作，冇唔習慣，好enjoy。」返工會唔會掛住小朋友？ Aimee話：「都會掛住，但同時間我太熱愛同enjoy工作，覺得係一個成功挑戰。」

問到陳豪會唔會再喺電視或電影上同老婆夫妻檔出現？陳豪話：「電視未係時候，時間太長，一拍就3至4個月，唔見咗個爹哋都算啦，媽咪都唔見埋，咁點得㗎？電影時間唔需要太長，辛苦嘢等我做啦，暫時唔想太太咁辛苦。」兩夫妻會以拍廣告出活動為主。陳豪話：「之前推咗好多個夫妻檔廣告同工作，因為覺得當時未係狀態，o依家多啲嚟密啲手。」佢哋又話唔抗拒親子或真人騷，但要睇咩程度同有幾深入，主要視乎節目性質。

陳豪和Aimee現育有兩子一女，問到係咪夠晒數？陳豪笑言：「都係嗰個問題啦，之前我話多啲嚟密啲手，有人叫我做絕育手術，但一定唔會，生唔生一件事。」Aimee話：「No，我要做下嘢先，認真地工作。3個小朋友已經好踢腳，歲數好近，做吓嘢先啦。」陳豪有所保留笑笑口話：「即使有都唔係o依家，遲多幾年先，我哋大家都好鍾意小朋友。」