商務及經濟發展局噚日向立法會提交文件,披露通訊局不予亞視續牌嘅原因。通訊局指,亞視自09年起財政狀況嚴重倒退,流動資產不足。
奇就奇在,亞視喺提交續牌申請時,就指佢哋計劃於2016年至2021年期間投資27億元,通訊局質疑亞視係咪真係有足夠財力做到。另,文件又指公眾意見對其節目製作及其他方面反映不滿,如果仲俾佢哋續牌,會俾業界錯誤訊息,以為表現欠佳仲可獲續牌。
文件中亦指,亞視嘅表現根本未達所需標準,即使續期牌照期較短,甚至縮減服務範圍,都難以辯解點解仲可以續牌。而亞視問題徵結所在,係源自股東分歧。
今午葉家寶去完港台受訪後,回應番亞視「三大死因」,逐個point話:
1.「第一,大家都關注財政問題,呢幾個月發薪係會遲咗,而法庭判決令人覺得大股壓細股東,法庭判決要求黃炳均出售10.57%股份,令大股東不再投資。其實過去好長時間都係由大股東借錢俾亞視出糧,依家冇人注資,發唔到薪。
「我哋原意俾啲補充資料通訊局,令佢知道亞視股東可能有變動,睇下政府可否俾我哋重新發展,但依家睇唔到呢個機會喇。」
2.「至於節目質素,真係見仁見智。有啲節目有觀眾賞識,但亞視嘅製作單一,唔係多樣化,同埋冇自己製作嘅劇集。但一家電視台係咪真係需要拍劇?呢個都需要思考。好多節目都有質素,仲得獎,唔覺得質素有問題,而且呢一兩年都減少重播次數,增加咗新節目,一路改善緊。」
3.「亞視嘅管治問題,關鍵係過去股東不協調,令人有好亂嘅感覺。亞視嘅管理層係好專業。一直改善緊。」
其實頭先葉家寶都承認亞視係冇儲備,咁已經夠啦…