【李八方online】特首辦打突先生接任人 係莊啟程第二小學校友
李八方姚繼卓林鄭登場
保良局莊啟程第二小學嘅簡介,介紹過Arsene呢位校友。互聯網
Arsene(紅箭嘴)噚日亦有喺林鄭見傳媒時,同特首辦主任陳國基陪伴在側。謝榮耀攝
添馬政總有別於以往,返工嘅人笑容可能多過以前,或因新上場嘅林鄭月娥,開步勢頭唔錯,而特首辦亦有新人面上場,職級屬D2、由政務官擔任嘅助理處長(傳媒)由姚繼卓(Arsene)擔任,噚日(7月3日)朝早已經陪同林鄭喺特首辦見傳媒咯,今日亦有喺行會前亮相。
呢個位嘅職責包括負責協助新聞統籌專員同傳媒聯絡、為特首制訂公關策略等,煲呔年代係「心戰室」成員,梁振英上場後角色就變得較次要,大家稍有印象可能係黎日正Anson,皆因佢喺梁振英自認超然時喺旁邊超自然打突,其後調咗任去瑞士日內瓦海外辦事處。
至於Arsene呢,佢今年38歲,港大畢業後喺2001加入政府,之後喺好幾個政府部門做過,例如2004年至2006年喺房屋及規劃地政局做助理秘書長,有份參與西九文化區,2014年仲因為許仕仁新地案要出庭作供。佢亦試過駐日內瓦辦事處,其後喺財經事務及庫務局首席助理秘書長(財經事務) ,處理過《公司(非香港公司)規例》;在任發展局首席助理秘書長(規劃及地政)時,出席過立法會帳委會有關屋宇署對違例建築工程嘅聆訊。
八方問過Arsene,佢話今次係首次做啲較多接觸傳媒嘅工作,日前亦有陪林鄭落區熟習一番。八方更發現佢係保良局莊啟程第二小學校友,該校2013年嘅簡介資料中,就喺校友會欄目見到Arsene嘅相,當時佢似乎係返母校參與活動噃。