曾經係日本國民女團嘅Morning娘，多位昔日成員都先後嫁人，近年仲排住隊做人母！好似當年嘅當紅主將後藤真希，今年6月中宣佈為圈外人老公懷有第一胎，預產期係12月，係繼辻希美、藤本美貴、市井紗耶香、中澤裕子、石黑彩及加護亞依等之後，第8個媽媽級Morning娘歷代成員。

已經30歲嘅後藤真希，上年7月同比佢細3年嘅圈外人結婚，今年2月喺東京一間酒店補擺喜酒，後藤真希早前已專心養胎，又被傳媒拍下外出近照，明顯見佢肚凸凸去超市掃平貨，越來越有師奶風範。

後藤真希一向唔介意性感，最近為平反早前嘅肥師奶指控，佢為時尚雜誌《NumeroTOKYO》拍攝一輯靚相，今次係喺酒店房入面進行拍攝，見懷胎8個月後藤真希換上多套時尚孕婦裝，當中不乏低V設計長裙，令其豐滿上圍更有睇頭，展露大肚婆最美一面。