立法會帳委會呢幾日討論審計報告，噚日預留四個鐘審直資學校醜聞，但委員會主席黃宜弘開咗一個鐘會，就話要小休15分鐘，在場人士都覺得有啲突兀。休息後復會，改由鄭家富頂上，阿富話黃宜弘唔舒服走先，由佢暫代主席，後來再交副主席陳茂波主持會議。

孫公回帶嘥時間

據講黃宜弘初時話自己只要休息15分鐘，但後來撐唔住，惟有去睇醫生，阿富話唔想爆人私隱，所以不便多說黃宜弘情況。八方曾聯絡黃宜弘想問候佢，其辦公室職員話唔知老闆去睇醫生。黃宜弘在位多年，今個月72歲大壽，雖然做功能組別議員好他條，但開呢啲長命會議都唔易捱，早前傳出黃英豪想接棒，如果後繼有人，就無謂攞苦嚟辛啦。
噚日個會唔好話政治老人，正常人都可能頂唔順，皆因自稱冇牙力嘅孫公竟然林D9上身，反反覆覆講直資學校唔係間間都有衰嘢，又三番四次指係前朝遺下問題，議員紛紛要求佢唔好回帶，否則浪費大家時間，罪加一等。