有魔童之稱嘅王維基，旗下嘅香港電視（HKTV）喺今日確認將不會繼續本地免費電視節目服務牌照的申請，有關嘅無線電頻譜交退通訊局，消息傳出後，唔少曾經與港視合作過嘅藝人都覺得可惜。

「港版半澤」陸駿光今日接受《蘋果》訪問，佢話：「知道呢件事之後，都有少少可惜，亦都有啲感觸，當日係hktv叫醒咗我， 話畀我聽原來我都可以有機會嘅，不過都好多謝 hktv 帶畀我嘅嘢。」

當日有份參與《選戰》嘅王宗堯就話：「其實係可惜，因為其實佢之前一路咁雄心壯志去發展，當然係好希望香港多一個人係可以喺呢行上面做，等大家多啲機會，尤其佢之前拍嘅劇都幾優質，只不過，件事都擾攘咗好耐，唔知佢剩係放棄大氣電波定係其作所有關於製作業務，佢有一個媒體中心，可以租借俾其他人士去用，所以我諗佢因為佢搞HKTV MALL，成績都唔錯，都祝福佢，佢諗法有改變，希望佢仲有想繼續搞創作嘅一日，o依家睇電視風氣唔係咁盛行，我相信有其他辦法，連亞視都搞App，唔知會唔會搞網上平台，搞網上電視。」

另艾威亦表示：「關於王生放棄電視牌照申請，其實我比佢更早放低呢件事，我心裏面其實一早冇咗申請牌照呢件事，目前向新方向出發，包括電影方面，將港視牌照申請拋諸腦後。」

精選娛聞，喺晒《娛果》
http://fb.com/appledailyent