(新增內容)

關智斌(Kenny)近年喺大陸狂搵人仔，身價三級跳，有傳佢喺香港至少有兩層樓揸手，喺北京、橫店，甚至喺加拿大都有置業，去年再以1,694萬港元，購入清水灣新樓盤傲瀧一個968呎單位，連密友張敬軒今年6月喺紅館台上都恭喜Kenny再做業主。(相關新聞﹕ https://bit.ly/2ldXuai )

Kenny間新屋最近終於都裝修完畢，可以入住，絕對係一件值得慶祝嘅事。點知噚日新居就發生咗一件小插曲，搞到Kenny非常無奈，佢喺ig留言﹕「今日興致勃勃返香港，終於進駐苦等了半年的新居！首先來一個洗手間開光儀式，在新居來個處男洗澡，然後就自然地打算刷牙，一不小心手滑把漱口杯跌入洗手盆中，然後...然後...#佢穿咗 #佢穿咗呀！！！ #話俾我知唔係真嘅，BTW個漱口杯完全沒有受損。」

唔少網民睇完都feel到Kenny嬲到欲哭無淚，但又忍唔住取笑一下，留言﹕「豆腐渣工程，驗埋個浴缸啊」、「應該係你太lucky，洗手盆上最弱嘅力點位都比你擊中！」、「你隻杯咁堅要介紹吓」、「洗手盆底條友笑得好燦爛」。就連好友蔡卓妍都留言﹕「你係咪又貪平呀？哈哈哈。」胡定欣話﹕「搵咁多，慳埋呢d錢。」關智斌即為自己平反﹕「跟機(樓)包埋架，我咁精打細算，平得嚟都一定會好囉。」

Kenny今日再更新ig，原來發展商已經極速幫佢換個新嘅洗手盆，令佢滿懷安慰﹕「多謝大家對我洗手盆的關心（其實係恥笑）⋯的保安哥哥有關注我IG⋯昨晚凌晨已經首先致電給我問我有沒有受傷，然後今早以迅雷不及掩耳的速度替我更換一個全新的！而且還給我全屋重新再仔細檢查一遍，然後⋯他説客廁洗手盆都替我換掉，這個售後服務令我很想給多一點管理費（講吓笑啫）。」Kenny仲讚保安哥哥好體貼，仲教埋佢點用家庭電器，包括熱水爐、洗衣機、洗碗碟機同雪櫃，Kenny留言﹕「七夕感受到保安哥哥的愛。」

精選娛聞，喺晒《娛果》 http://fb.com/appledailyent