日本長腿女星菜菜緒由Model界轉戰影視圈後頗吃得開，佢由日劇《FirstClass》開始演活惡女角色，上年喺懸疑劇《Siren》中又飾演整容殺人犯贏得觀眾支持，成功以奸到出汁形象殺出血路。

27歲嘅菜菜緒形象性感又惡死，而佢演惡女及八婆角色已深入民心，早前佢都展現出私下都唔好蝦一面，菜菜緒多次透過ig鬧爆有人利用佢帳戶賣垃圾廣告。菜菜緒近日身在泰國，佢噚日就po咗浸浴自拍照，而呢次仲體驗餵象，拎住生果籃嘅菜菜緒當走近大象時，象鼻索索吓差啲啲就掃到佢條長腿，仲將佢手上嘅生果搶走，平時惡死嘅佢都差啲被象鼻嚇親。咁難得親親大象，菜菜緒當然要同象仔合照，象仔仲翹腳將右腳俾菜菜緒當凳坐。