今日有雜誌報道，指汪子琦一連串高調嘅行動，都係因為要同Laura箍煲，知情人士話：「TB汪成日話同Laura冇得掹，又話自己犯賤偷食要懺悔。其實不知幾想同Laura復合。加上佢呢排賭錢賭得好唔順，要搵人幫手。佢知Laura憎馬賽憎到出汁，為討對方歡心，咪爆馬賽大囉。」

另外，仲講到馬賽同之前口口聲聲話係青梅竹馬嘅富二代男友，報道話佢哋兩個喺深圳讀書撻着，拍咗拖兩年，不過當時男方作風好低調，住喺學校宿舍，所以馬母對男方嘅家底全不知情，報道又話馬母棒打鴛鴦，仲打俾個男仔，叫佢唔好阻住馬賽前途，仲講咗好多侮辱嘅說話。

知情人士話：「呢件事俾男仔個阿媽知道，本身已經唔想阿仔同呢啲女仔拍拖。順水推舟，勸阿仔分手。馬賽兩母女諗番轉頭，肯定覺得自己捉蟲兼走寶。」