古天樂、韓星宋智孝同楊千嬅等今晚到銅鑼灣出席某韓國太陽眼鏡品牌旗艦店GentleMonster開幕，吸引大批粉絲圍觀，古仔於暑假有5部戲包括《三人行》、《使徒行者》等上映，出現自己打自己場面，問到會否擔心拉低票房？古仔笑住話：「希望拉低奧運(收視)，至於朋友就拉低褲頭睇晒五部戲。」

今日天氣酷熱，古仔開工拍陳木勝新戲《喵星人》，有工作人員中暑要報警，佢話：「自己都好攰，好在自己冇事。」問到會否考慮投資韓國市場？古仔表示：「自己只係演員，都有睇韓片，通常搭飛機睇，佢哋嘅電影都包羅萬有。」今日首次同智孝見面，問覺得對方吸引嗎？古仔話：「佢出咗名唔使化妝，至於有冇機會合作，我哋做演員好被動。」