【有《金電視》仲有《姊妹》】大細V周慧敏黎瑞恩搵番自己玉女Look
賽馬會娛記正傳
94年嘅跌膊look,同2017年嘅跌膊look,找不同。 (周慧敏fb圖片)
你有冇見過呢啲娛樂雜誌?(「娛記正傳2」fb圖片)
未見過?咁證明少年你太年輕了。(「娛記正傳2」fb圖片)
明天就係哥哥離世14周年,重看這些封面,百般滋味在心頭。(「娛記正傳2」fb圖片)
馬來西亞手造人偶達人趙澤田(Tean)借出私人珍藏。
兩代玉女掌門人——周慧敏與黎瑞恩(小恩子),兩個都叫Vivian,同屬寶麗金捧出來嚟,周慧敏係大V,黎瑞恩係細V,噚日大V同細V一齊出動,到賽馬會創意藝術中心《娛樂正傳》展覧場地支持,睇番當年自己嘅玉女look,大V都忍唔住笑。
展覽上仲有一條「木人巷」,大V就喺呢條木人巷搵番自己出道嘅相,都忍唔住笑:「嘩,嗰陣真係青春無敵喎!依家好難影得番喇。」展覽上仲有YES!卡抽,同埋好多已經停刊嘅娛樂雜誌,例如《玉郎電影》、《金電視》、《姊妹》、《螢幕偶像》、《大眾電視》,同埋無綫官方刊物前身《香港電視》迷你版,應該勾起好多姊姊妹妹追星回憶啦。
細V黎瑞恩就話好難得一班有心嘅娛樂記者出錢出力展覽佢哋嘅珍藏,佢話:「睇番自己當年喺樂壇嘅相,真係個快樂時代,我知道今次係『娛記正傳』第二次展覽,好希望可以展覽多十幾廿次啦,等大家知道嗰陣記者生活係點!」家陣細V忙緊籌備唱片,遲下仲會擔任賈斯樂演唱會嘉賓。
展覽舉行埋聽日就完㗎喇!最後一日開放時間係早上11點到晚上7點,地點係L0 藝廊。適逢聽日係哥哥離世14周年,能在展覽中「重遇」哥哥,真箇百般滋味在心頭。