在谷哥打下「高琳琳」3個字，維基百科都有詳盡紀錄，當年引起全城關注，連其時的特首曾蔭權，亦去信高氏夫婦慰問，在早於社交網站仍未盛行的06年，錄得逾40萬人瀏覽、共1.05萬個留言，迴響巨大。只是十年人事幾番新，仍然愛「分享」的高展鵬，直言今時今日，所謂的感動全城，肯定今非昔比。「06年嘅社會始終簡單啲，嗰時寫blog好流行，用文字分享生活，大家比較易感動。」面書、instagram，網絡直播全紀錄，網民愈趨「重口味」，說感動，談何容易。

《九天生命日記》網誌，原意是讓親友追憶，但卻引起巨大關注，高展鵬謂是意料之外。「冇諗過我哋嘅小故事，可以鼓舞到咁多人，我最記得，當年連留言版都留爆咗，好誇張」。愛寫作、閒時透過寫blog分享生活，是他的習慣。「琳琳出事，要同親戚朋友交代，好沉重，唔想逐個講，先決定透過blog記錄，等佢哋自己睇，冇諗過竟然有記者打嚟問，以為只係簡單問幾句，結果做咗頭版，引起咁多關注」。人生環環緊扣，十年之後，你還記得這個只生存9日的孩子嗎？