當年今日
關於我們

【姊妹團親身體驗】Anjay婚禮好多感動位 吳嘉熙:陳瀅乜都Drink

蘋果日報 2017/11/26 18:48

陳嘉寶陳瀅吳嘉熙余香凝

余香凝、顏卓靈、Super Girls(SG)等今日喺旺角麥花臣場館出席「飲食業安全奬勵計劃頒奬典禮暨嘉年華會」,余香凝透露下月接拍新戲:「要飾演大肚婆角色,導演要求我剪頭髮,其實中三時我試過剪短,當時劣評,好唔襯,因為我面肥。」演大肚婆要唔要增肥,或者上圍要唔要豐滿啲?佢指呢個唔算係一個幸福嘅大肚婆。男友陳家樂有咩意見?佢笑住話:「佢點都話靚!」
講到顏卓靈喺年尾樂壇頒獎禮上,同好友劉敬雯(奶茶)一同角逐新人獎,不過佢話唔會成為自己嘅勁敵:「做新人會好孤單,唔似電影可以一大班人一齊。」會唔會一齊去揀衫出席頒獎禮?佢話:「我哋嘅歌係唔同風格,不過我希望可以唔小心咁襯到。」
此外,對於SG成員吳嘉熙(Cheronna)擔任陳嘉寶嘅姊妹團之一,佢透露噚晚嘅婚禮上有好多感動位:「噚晚播番Epaphras(黃頌祈)向嘉寶嘅求婚片段,佢當嘉寶係公主咁,好錫佢,Epaphras爸爸又講咗好感動嘅說話,同埋嘉寶嘅媽咪幫佢著裙褂嘅時候,佢同嘉寶講『唔好唔記得媽咪呀』,好感動,成晚睇住嘉寶嫁俾一個咁好嘅老公,好戥佢開心。」問到Cheronna有冇飲醉酒?佢笑住話:「我飲咗好多,但飲醉嘅唔係我,陳瀅好鍾意飲酒,乜都drink、drink、drink,我要照顧飲醉嘅人,不過當時好驚,有啲人搵賴慰玲借力,好好笑。」其他成員追問Cheronna幾時輪到佢結婚?Cheronna沒好氣咁笑住話:「我只係鍾意玩人哋嘅小朋友咋!」
更多娛聞,喺晒《娛果》
http://fb.com/appledailyent