爭金像獎出蠱惑
馮仁昭四圍超:大老細幫愛將造票

蘋果日報 2004/02/02 00:00


第二十三屆香港電影金像獎頒獎禮四月四號喺尖沙嘴文化中心舉行,第一輪票選今日截止,所有候選名單今個月十二號就會公布。噚日馮仁昭同金像獎協會主席文雋食晏,佢話發現有會員投票時竟然造票:「有一間公司搵人代填所有投票表格,所有筆迹都係一模一樣,由於之前我哋有晒所有投票者嘅簽名,可以對字迹,好明顯有人喺度造票,所以我哋即時將呢四、五張選票作廢。」

欲邀劉曉慶頒獎
雖然文雋唔肯講係邊間公司造票,但據馮仁昭所知,呢間公司個老闆有個愛將,老闆為咗愛將同自己公司嘅戲攞獎,所以咪係咁造票囉!可惜佢哋搵同一個人去填寫,想唔俾人發現都幾難!
另外,文雋話希望今年搵昆頓塔倫天奴(QuentinTarantino)同劉曉慶做金像獎頒獎嘉賓,但就暫時未知劉曉慶可唔可以出境。文雋又話為鼓勵更多人積極投票,出年正計劃推出金像獎選民卡,到時投票者會有食肆同睇戲等優惠。
empty
呂良偉囝囝搶老竇鏡
呂良偉同任賢齊獲加納共和國郵政處發行肖像限量版郵票,噚日呂良偉一家出席喺灣仔舉行嘅亞洲巨星郵票匯展活動,見呂良偉個囝囝活潑得意,攞住支潤膚膏當咪唱歌,又表演打功夫,見到相機鏡頭又識揮手,搶晒爸爸風頭。不過呂良偉心情依然大好,請埋老婆同囝囝上台影相,重情不自禁錫咗太太一啖。我馮仁昭見到咁溫馨嘅場面,都好鬼羨慕!

黃泆潼擦海鮮避禽流雞
黃泆潼農曆新年去咗泰國旅行,佢話一早收到風話當地有禽流感,所以唔敢食雞,只食海鮮。黃泆潼日前話:「我曬黑咗,呢排狂做美白,因為我遲啲有新戲開工,同Edison(陳冠希)會有對手戲,雖然佢好靚仔,但就唔驚俾佢電親。」咁講Edisonfans大可放心喇!

阿倫做騷收金牛
譚詠麟同李克勤前晚繼續喺紅館舉行「左麟右李04開心演唱會」,陳百祥同黃杏秀都有去捧場,佢哋睇完騷後重入後台同阿倫拜年。而阿倫話:「今年收到好多觀眾嘅利是,試過有女觀眾冇利是封,佢就拎張金牛塞畀我,見佢咁熱誠咪收咗佢囉。」咁好搵,唔怪得佢哋專喺新年開騷!
馬浚偉表演汗流入眼
馬浚偉前晚幫金飾集團表演,佢着晒厚衫喺台上又唱又跳,大汗叠細汗,重話啲汗流咗入眼,搞到副隱形眼鏡都差啲沖甩埋,夠晒誇張。馬仔重話新年雖然打牌輸咗幾千蚊,不過好彩識咗啲出版界老闆,幫佢出書之餘,重𢭃咗幾萬元利是補數。

藍潔瑛等出院好精神
藍潔瑛噚日繼續喺東區醫院嘅精神科接受治療,好友林建明就帶咗湯水去探佢,重逗留咗成個半鐘。問到藍潔瑛今日係咪可以出院?林建明話:「都要等醫生巡完房先知,佢今日嘅精神比前幾日好好多,都有進步㖭。」
empty
呂良偉(右二)
empty
黃泆潼
empty
譚詠麟(右)
empty
馬浚偉
empty
林建明
empty
藍潔瑛
資料圖片