【債主臨門】徐德強接管福臨門後大改革 廚師離職 富豪轉場「家全七福」
蘋果日報 2020/03/10 21:23
福臨門楊小娟林心兒
歷史悠久、有「富豪飯堂」之稱的福臨門，其第三代負責人徐德強被財務公司入稟高院追債3,290萬元。其實福臨門的繼承人五哥徐沛鈞及七哥徐維均於2009年鬧不和，至12年庭外和解，結果五哥成為贏家，以約8億元賣盤給七哥，七哥亦即另起爐灶，在灣仔福臨門附近開創「家全七福」粵菜館。由於七哥徐維均每事親力親為，對食物品質和服務態度有嚴謹監控，所以生意尚算不錯。反而五哥徐沛鈞近年因身體欠佳，把福臨門酒家交由兒子徐德強管理後，引入新人事、新作風，為酒家進行大改革，還在中港兩地開設私募基金公司，但據知他的管理和投資都是損手。
徐德強上場後，福臨門不少廚師都離職，他引入不少酒店式管理人員和廚師加盟酒家，但光顧多年的富豪們反而不喜歡新改革後的福臨門，覺得餸菜也不合口味，所以就減少光顧，反而不少富豪都轉往光顧「家全七福」，令到福臨門生意每況愈下。近日更受疫情影響，女馬主周巧兒確診武漢肺炎前曾到灣仔福臨門，福臨門上月26日宣佈，灣仔店暫停營業至3月3日，以進行全面清潔及消毒，而尖沙嘴店則維持正常營業。
福臨門多年來被冠名人飯堂之名，除了廣為人知的「大劉」劉鑾雄多年前曾經是飯堂的常客，不少名人也經常光顧，呂良偉與太太楊小娟也是福臨門的捧場客，幫襯已有20年，楊小娟今日接受《蘋果》訪問，她說：「我哋幫襯咗好耐，都有20年嘞，我哋間唔中都會去，最鍾意佢哋嘅點心、鳳爪、排骨、腸粉，仲有佢哋嘅烤乳豬，呢啲傳統食物我都好鍾意，我個仔細細個已經喺嗰度蒲。」問到食物的品質可覺得有所轉變？她說：「佢哋嘅食物都好有保證，我覺得品質都保持住，因為以前老爺好鍾意去嗰度飲茶，我哋經常都會一齊去，不過佢走咗之後就少啲，但都有間唔中去，有時晚飯、做節都會去。老闆有時都會過嚟同我哋傾吓食經。」小娟了解過今次追債事件後，她表示不知情並說：「佢哋係一個幾廿年嘅香港牌子，相信生意喺疫情下都會受到影響，希望可以過到，每個人都有難處，其實世界有好多問題，大家都要樂觀面對，多啲關懷。」
而林建岳女兒林心兒被問到近期有否幫襯福臨門？她說：「我好耐冇去過嘞，都有年幾冇去，平時都係去返屋企嘅餐廳，我不嬲都好少去，我冇聽到呢個消息，希望冇事啦。」
（資料圖片）
楊小娟（右）曾與好友榮文蔚到福臨門午膳。（資料圖片）
林心兒表示已很久沒有幫襯福臨門。（資料圖片）
徐德強接管福臨門後大改革。