家陣仲係封建時代咩，仲要以「少爺、小姐」稱呼master嘅仔女？嗱，確實真係有人咁家春秋feel㗎，佢就係香港人嘅特首嘞。禮賓府前總廚鍾建良喺噚日出版嘅《東周刊》訪問中大爆，梁特吩咐佢要稱呼自己嘅仔女為「大少」及「小姐」，唔可以對傳昕、齊昕同頌昕三兄妹直呼其名；相反前特首煲呔就畀佢以英文名稱呼兩位公子，直接叫曾慶衍同曾慶淳做Simon同Tommy就得。
八方噚日問過特首辦，到底CY係咪要求前家廚以「大少」及「小姐」稱呼仔女，但截稿前冇回覆。八方其實更想知道，CY有冇同時要求府內人員稱呼自己做「老爺」、梁太要叫「夫人」？咁樣先至儲齊成套封建「稱號」夠晒爆。

讚齊昕有禮 鍾意食麵

鍾建良其實係喺舊年初離開禮賓府，大約服待咗CY一家一年幾，佢離府時齊昕仲未返港居住。佢除咗爆CY落咗「稱號」柯打，亦談及梁家飲食習慣，話CY同老婆每星期只有3或4日返屋企食飯，開飯無定時，大概晚上6、7點先會話佢知，今晚想食乜，但佢哋一定「食得好簡單」，祖籍山東嘅CY鍾意買餃子同包返去蒸煮，又會喺府內種菜自用，「有時煮埋皮蛋瘦肉粥就一餐」。
近期嘅風雲人物齊昕「二小姐」，鍾建良就話好少見，但就話佢幾有禮貌，見到面時會叫佢一聲「師傅」，而且同細妹一樣鍾意食麵，「公仔麵都會食」。主僕情深，曾慶淳近日開餐廳，都搵鍾師傅坐鎮主理，唔知CY會唔會帶「大少」同「小姐」去幫襯？

李八方

mailto:[email protected]