對於好多納稅人嚟講，公屋政策只係有份出錢冇份享用嘅包袱。或者唔少人會話，私樓假假哋都係個人財產，好彩嘅仲有得升值賺錢，住公屋一世都係租客，係無殼蝸牛。不過，政府幾年前整咗個租者置其屋計劃，將公屋單位賣畀公屋戶，最初個個都唔睇好，又話公屋殘舊無管理無設施，即使售價超低，十足政府賤賣資產一樣，反應都係一般。
反應差還差，由於出售公屋定價超平，唔少買咗嘅住戶，等兩年轉售期限後，都紛紛喺唔使補地價嘅第二市場放盤，因為整體樓市升咗，唔少公屋叫價都比購入價高一倍以上，不過都仲係平過居屋，所以不乏承接，班公屋富戶呢鋪可謂本小利大。

祥益謝澤銘透露，屯門北區有三組出售公屋，包括良景邨、建生邨同埋田景邨，其中良景邨2座高層25室，635呎，01年購入價只係15.49萬元，呎價244元，仲平過大陸鄉下嘅樓價，早兩日以第二市場價32萬元轉售，賺咗16.51萬元，個人資產5年間升值超過一倍，以比例計好過炒豪宅。
電郵地址：[email protected]