天安(028)過去半年喺最近3年低位橫行,郁都未郁過,內房股熱炒,轉吼天安。由上年10月到家陣,已經有唔少內房股熱炒,龍頭好似中國海外(688)翻咗一番。富力地產(2777)仲巴閉,5個月累積升幅3倍,天安同期係冇郁過,落後到極點。
天安最新NAV6.53元,現價(2.03元)折讓69%,內房股有咁嘅折讓,好吸引。天安家陣喺祖國嘅土儲,樓面高達6625萬平方呎。呢期金融海嘯,講增值似乎嘥氣,但祖國有能力最快恢復增長,加埋天安咁龐大土儲,中線增值潛力,唔係嘢少。簡單計數,天安土儲每方呎係咁意增值100蚊,已經可以為集團帶嚟66億銀增值,係集團市值1倍。
再講,天安手頭現金近25億銀,淨現金5.8億銀,銀彈充裕,進可攻、退可守。呢轉博天安翻半番到3.05元,相對重估前NAV,仲有53%折讓。