眾所周知，湖人新秀榜眼朗素波爾（Lonzo Ball）嘅老竇拿化波爾（LaVar Ball）成日都口不擇言，而快艇後衞比華利（Patrick Beverly）喺周四助球隊擊敗湖人後，就話波叔太多口，令聯盟所有球隊都會更落力「招呼」波仔。

不過都唔怪得比華利咁寸，《ESPN》嘅數據顯示，波仔俾比華利防守嘅29個攻勢中，兩次起手全炒，亦冇機會交出助攻。比華利仲喺更衣室外爆晒粗咁暗寸波仔：「嗰條友渣到爆。畀佢落場，然後我會打爆佢！」不過波叔之後就死撐「而我不知比華利是誰」，暗寸對方借自己個仔出名：「你係守死咗佢，OK，但邊個係比華利？上季冇人留意你，但今季第一戰就有人討論你？係因為你同朗素拉上關係咋！」