呢個世界幾時都係先敬羅衣後敬人,所以二代目出親街見人,例牌都會執到靚靚仔仔,至於指定每個禮拜兩Day入馬場,更加會尊重個場合,永遠唔會隨隨便便,必定穿西裝打領呔,呢個係多年嚟嘅習慣。
記得仲係英皇御准賽馬會嘅年代,進入會員席嘅男士,基本上99%都會自動着老西上陣,家陣雖然話隨便咗好多,但講到要落去拉頭馬,馬會真係規定咗Dresscode喎,會員手冊寫到清清楚楚,雖然未必一定要着西裝,但最起碼都要打呔或穿上外套,如果兩樣都冇,情況就會好似啱啱星期三隻「心花怒放」贏馬,馬主諗住邀請兩位公仔箱嘅藝員朋友一齊拉頭馬,但因為衣着唔合格畀保安阻止,呢單嘢《蘋果》即時新聞已經好快報道咗,真係羞死人呀!
老實講二代目少睇電視,真係唔知呢兩位係乜水,不過就有個馬主嘅靚靚囡囡問我,話舊年名廚熾哥隻團體馬贏出時,林峯落去拉頭馬嗰陣,都係冇呔冇外套,仲成身MK波鞋look㖭,但係又冇保安阻止佢落去,咁係咪即係馬會保安唔公平喎?哈哈,你問我,我問邊個喎,問番馬會咪最好囉。
講番周日心水,剛啱尾場十三少騎「兵工闖」爆得精采,睇嚟今次應該輪到佢攞番次騎師王,亦可憑「喜蓮巨星」捧走精英碟。