本港除咗有個官方天文台，仲有個由氣象發燒友組成嘅「地下天文台」，不過約兩年前，官方天文台也差啲變咗地下天文台。
事緣天文台雄踞尖沙嘴山頭，但辦公室用地唔夠，要喺附近美麗華大廈租四分一層做附加辦公室，租金都幾貴。天文台向政府要求撥地，點知當局派咗區內金巴利道君怡酒店地庫嘅政府地方畀佢哋。
呢個安排搞到天文台震晒。嗰處現時係「吉」位，八方噚日睇過，同垃圾收集站只有一牆之隔；最大鑊係天文台要望天打掛，匿喺地庫點睇天呢，八方聽聞佢哋忍唔住自嘲話「我哋咪做咗地下天文台？」
台長岑智明噚日話，有計劃喺現址擴建或原址重建，不過仲係好初步。