張繼聰今晚去到九展出席黃子華、佘詩曼主演電影《棟篤特工》嘅首映禮。日前老婆謝安琪（Kay）有一段whatsapp錄音流出，講出佢對流感疫苗嘅睇法，但就被人狠狠批評。（新聞連結： http://bit.ly/2BjHH3k ）

阿聰話事件發生後有錫番老婆，仲話事情實在有太大迴響，佢就借住今日講番佢嘅睇法，阿聰話：「返番去最初一步，呢個係老婆私人朋友群組對話，唔係公開呼籲去推廣，希望大家都可以明白。」

阿聰強調，自己同Kay 對疫苗有共識，係相同睇法：「老婆自己花咗好多時間，睇一啲相關資料，一啲醫學報告去講，唔係特別去鼓勵其他人打個疫苗。」佢解釋無論係醫生、專家、任何人，都係為咗保障其他人健康而努力。

作為丈夫，阿聰親眼見證到其他人見唔到嘅事，包括Kay有幾落力睇資料，佢話：「雖然事發我拍緊戲，但我可以講，我平時喺屋企見到老婆花咗好多時間睇一啲相關醫學資料，不過咁，有時好多科學嘢有好多新發現，我作為老公見到佢做好多功課，大家都係為小朋友着想，始終疫苗都係打啲嘢入身體入面。」

但錄音一流出，包括政府在內嘅好多聲音湧現，覺唔覺得政府反應太大呢？阿聰話唔會評論政府做法，但喺fact check呢方面，Kay真係花咗好多功夫。有人亦都講，唔係專業唔好評論唔好講，阿聰就覺得有啲話題可以自由討論，佢仲舉例：「如果唔係專業唔講得，拍完戲唔講得咁就冇影評，咁18歲前都冇人係專業，咁樣世界咪好悶？我覺得世界上嘅嘢可以多啲了解，提出多啲疑問。」

而私人群組嘅錄音流出，阿聰話佢同Kay都唔會將惡意留言放上心，總之大家都係為咗小朋友着想， 捉凶手都唔係重點，亦都唔會刻意退出群組。

最港電影大獎投票網址
http://bit.ly/thekongestfilmawards

精選娛聞，喺晒《娛果》
http://fb.com/appledailyent