好多馬迷鍾意喺季初追騎練開齋，告仔同韋達啱啱夜馬亦打破悶局，現時只剩低幾個騎練仲守緊齋，其中較受追捧嘅應該係柏寶。柏寶今日（24日）手執頭場「實業風采」同第八場「真好漢」等實力馬，應該好多馬迷都諗緊佢會唔會好順攤咁贏熱門開齋。

柏寶當年幾乎成功威脅到韋達嘅冠軍寶座，搏殺時嗰份狠勁真係冇得頂，冇人估到佢呢幾季成績會跌得咁犀利。無可否認，家陣柏寶嘅支持已經大不如前，況且佢一向難捉摸，剛戰夜馬兩隻熱門「笑眼光」同「皇帝誥令」就跑到無影無蹤，買咗落去真係輸得有啲不明不白。究竟係馬定人嘅問題就不得而知，但係捧柏寶嘅馬就預咗有好大風險。

聽過唔少馬迷提起柏寶都話怕怕，皆因佢哋對柏寶嘅印象係不折不扣無寶不落，唔慌正頭正路。其實對柏寶呢類騎師又唔使心煩，最簡單就係冷敲熱避，熱門嘅話就要格外小心，唔買冇損失，冷門反而唔怕買少少博大霧，隨時有意外收穫。

無疑每個騎練都想盡快打開今季勝利之門，馬迷追馬房追騎師開齋，唔可以話冇根據，但係捉唔捉得中就係另一回事，好似告仔夜馬尾場就爆隻50幾倍大冷門「華美之友」開齋，相信好多追緊告仔嘅馬迷，都捉錯用神以為「英勇大師」先係主力。跑馬就係咁，或者告仔都係抱住盡跑心態，稍為有啲信心隻馬都唔會咁冷。

不過，今季只開季冇耐，馬季流流長，即使現時未開齋嘅騎練，其實私下都唔係咁心急，正如十三少所講，開齋只係遲早問題，呢句可以話係廢話，但亦係老實說話。若再跑多十次八次都未齋，可能先會較為緊張同有壓力。

阿Joe