「鐵幕國家」北韓繼1966年之後，再度打入南非世界盃決周賽，唔好以為呢個國家一窮三白，為咗國家光榮，又嫌現任教練金正勛保守得滯，最近就開始搵國際級教頭帶隊踢決賽周，一度傳出搵家喺英乙諾士郡做緊技術總監嘅艾歷臣，不過艾歷臣周三已經拒絕。
我求大俠初初睇呢單新聞，都以為喺吹水料，不過英國傳媒講到似層層，話艾歷臣今周就會同埋諾士郡行政總裁添布寧飛到北京，同北韓足總高層會面傾條件；後來艾歷臣就話，其實去亞洲，包括台灣、香港同泰國，只係為咗推介150周年會慶嘅諾士郡；我求大俠就唔係好信，乙組仔有咩商機呀，估計實情係佢老哥同北韓傾唔掂數啫。

大把好工　或教瑞典

「三色台」最近就做咗個介紹北韓人民生活嘅特輯，當地人着牛仔褲出街竟然係犯法，手提電話上年先有，食個漢堡包、飲杯汽水都唔容易；艾歷臣一向形象花花公子，成日換女友，如果要佢留喺平壤，可能一日唔夠就嫌悶要走人。而且北韓雖然都叫有鄭大世、安英學喺日本及南韓搵食，叫做有啲外流兵，但整體級數又點及得上世界一線隊，外圍賽掹車邊壓過褪色嘅伊朗同沙地阿拉伯出線，決賽周睇怕都喺分組賽出局。
好衰唔衰北韓領導人金正日一向威慣，冇錢都要發展核武，試射吓飛彈；艾歷臣諗諗下，萬一激嬲咗金領導，返唔返到祖家都成問題，或者到時又要靠前美國總統克林頓營救，所以真係怕死唔敢做呢份工！
其實世界盃外圍賽打完，好多國家隊都有空缺，好似瑞典戰績麻麻，拉格碧帥位不穩，克羅地亞又話想炒比歷，艾歷臣有啲耐性等一等，仲有大把好工等住做，無謂搵命博。