【22:00】新增機電署回應

近年本港發生過多宗墜𨋢事故，突如其來嘅急墜，嗰種離心力真係幾得人驚。今日下晝兩點，馮先生同屋企人喺火炭山尾街沙田商業中心2樓一間酒樓飲完茶，搭𨋢落地下離開，點知落到地下見到一班消防員喺隔離𨋢撬門救人，馮先生聽到有女乘客講，部𨋢突然間急墜，去到地下坐低咗一至兩呎深，有三個人受傷。

根據馮先生所拍嘅片段見到，消防員救出嘅其中兩名女乘客懷疑chok親條腰，坐咗喺客戶服務中心等救護車，其中一個女乘客就話，佢喺2樓搭𨋢落地下，部𨋢去到1樓「突然間呯、好大力咁掟落去......好彩係2樓咋，如果唔係我唔敢想像！」馮先生話出事嗰部𨋢應該係2號𨋢，之後見到2號𨋢同4號𨋢都圍封咗，電梯維修公司嘅職員亦都收到通知到場了解。

救護車將兩個女乘客同埋另一個伯伯送院檢查，伯伯要用擔架床送院，送院期間清醒。現場總共有6部升降機，另有扶手電梯同樓梯，地下至2樓係購物商場，3樓係停車場，樓上係寫字樓。今日係星期日，唔少人去商場食嘢行街，馮先生每逢六、日都會去嗰度飲茶，佢話最近商場嘅扶手電梯向下行嘅一邊封晒做緊檢查維修，扶手電梯有上冇落。所以顧客落樓離開多數都搭𨋢。

馮先生仲話，間中都有見到商場嘅𨋢或者扶手電梯封閉維修，但搭𨋢嗰陣就唔覺有乜唔妥，或者有乜怪聲傳出，相信物業都有定期檢查電梯。小記聯絡過沙田商業中心想了解件事，聽電話嘅職員承認升降機有事故，但就話冇負責人喺度，佢自己好忙，解答唔到我嘅問題。

機電署發言人表示，得悉事故後已即時派員到場調查。初步調查確認有關升降機的所有懸吊纜索狀況良好，沒有出現急墜，相信事故是因為訊號系統問題，令升降機機箱以正常速度由上往下到達地面樓層後仍未能停下，直至機箱觸動下限位安全制時，被安全系統制停。事故中有兩女一男乘客被困機箱內，其後由消防員救出後送往醫院治理。有關升降機已暫時停用，須由註冊升降機工程師進行全面測試，確認安全後才可恢復運作。

你敢爆，我敢獎！ 立即WhatsApp《蘋果》24小時爆相爆片熱線 或致電：63836568