聖保羅男女附屬小學黃竹坑新校舍噚日開放日，一眾名人校友、富貴家長濟濟一堂，焦點係難得同場嘅Victor李澤鉅同Richard李澤楷兩兄弟，咩事咁高興呢？原來Richard捐咗個「莊黃惠君女士廣場」同埋一間「高惠充室」音樂室畀母校。

紀念外婆的愛

Richard話呢位莊女士係佢外婆，雖然唔係佢媽咪（莊月明）親生媽媽，但視佢媽咪如己出，連帶亦極痛錫佢呢粒外孫仔，今次捐個廣場，係表揚同紀念外婆對莊家每個子孫無私嘅愛，而幾個一向當佢仔咁錫嘅舅父、舅母同阿姨（即係中南鐘表行莊氏家族成員），亦好讚賞佢咁孝心，所以噚日罕有地齊齊現身。
至於個音樂室，Richard話高惠充老師係聖保羅中小學音樂總監，係佢生命裏面五個最具影響力嘅人之一，個音樂室係佢對老師嘅一點心意！Richard唔肯講捐款數目，校方亦冇披露，消息人士稱，捐個廣場要1,000萬元，音樂室就200萬元。