家陣富二代認真唔簡單，隨時有過億元嘅物業揸手。繼早前「賭王」四太以13億元買入山頂豪宅Mount Nicholson四伙，以兩個女何超盈與何超欣嘅名登記；思捷（330）前大股東邢李㷧與林青霞嘅20歲女兒邢愛林，最近亦擁有一層逾億元豪宅。
土地註冊處資料顯示，中半山豪宅The Mayfair一個中低層B單位，實用面積2,118呎，最近由邢愛林（Ying Eileen）以1.15億元買入，中英文名字跟林青霞千金一樣，料屬同一人。

大美人擁同廈另一單位

The Mayfair有19年樓齡，位於中半山梅道，屬高尚豪宅地段，有消息指，林青霞早於3年前就以9,500萬元買入同廈一個單位。
林青霞17歲出道拍戲，有「大美人」之稱，佢1994年下嫁邢李㷧後便息影，兩年後誕下長女愛林，其後再誕下妹妹言愛。雖然係娛樂圈名人千金，但佢兩位女兒相當低調，消息唔多，邢愛林以20之齡就擁有一層價值億元嘅豪宅，估計都係父母支持吧。
邢李㷧多年前已經花過億元，喺飛鵝山買下3萬呎地皮建超級豪宅，有傳話佢兩年前將物業送畀林青霞做結婚廿周年禮物，今次以千金之名買入半山豪宅，莫非係女兒21歲生日禮物？

李華華
mailto:[email protected]